ગરબો:

માડી આવ્યાંના વધામણાં..

આભેથી અમૃત નીતર્યા,
ઋત નવલી આવ્યાંના એંધાણાં હો જી રે..
માડી આવ્યાંના વધામણાં....

ઝૂલે હિંડોળો વ્યોમ પરિવેશમાં,
ઘૂમે આરતનો ગરબો અશેષમાં,
હૈયે રણઝણ ઝાલરના એ ટાણાં હો જી રે..
માડી આવ્યાંના વધામણાં....

ગૂંજે તાળી બ્રહ્માંડમાં ચોપાસથી,
સીજે અંતરપરાગ પૂરણ આશથી,
શબ્દ સૂર થઇ લયમાં પડઘાણાં હો જી રે..
માડી આવ્યાંના વધામણાં....
કનુ સૂચક 'શીલ'

તા.૨૪.૦૯.૨૦૧૪

ગરબો-

ઓવારણાં...
મા! મારા હૈયાની પાટ તારાં બેસણાં,
માં! મારા શ્વાસેશ્વાસે છે ઓવારણાં

હીંચે હિંડોળો અજબ ગગન ગોખમાં,
જલે દીપમાળ અંબરની ઓથમાં,
વહે પળપળ ઘટમાળ તુજ હાથમાં હો મા!
હૈયાની પાટ તારાં બેસણાં,

પૂજા સામગરી કે અર્ચનની રીતને
જાણું ના, માનુ ના વિધિવિધાનને
મુજ અંતર ઉલ્લાસે તું ઉલ્લસે હો મા!
મારા શ્વાસેશ્વાસે છે ઓવારણાં
કનુ સૂચક 'શીલ'

તા.૨૫.૦૯.૨૦૧૪